Rev 5 | GbrGAW | STEP | Ma gye takarda n kmishi n za bwaizhe nwo sase tu n esul shinkpegye nyi, takarda n kmishi nya yi kafi n mi n ebmi yi, n cei gugui n na hatimiyi ngun tnaba.

Revelation of John 5

Kugya N Littafi Yi

1 Ma gye takarda n kmishi n za bwaizhe nwo sase tu n esul shinkpegye nyi, takarda n kmishi nya yi kafi n mi n ebmi yi, n cei gugui n na hatimiyi ngun tnaba. 2 Malaʼika kalada wa sawyi n begye lyakwoyi wa nyaɓo ge, “Nyikado nu kuncelo wa sa hatumi ye ya n takarda kmi-kmiyi, wa lokwoya?” 3 Ama to a bwa zaknayi n eshemi vinya, kwo dna n na anyi n wo kuncen, kwo dna n na a zafi n woɓa gu kwoya wa ba kwon.

4 Ma ci bwi n bugba wunyi, ntuge zaho to lo n bwaho nwo kuncen wa gnayi oɓo n kwo kafin.

5 Ama zaknayi n na a Tukwoda shiba cei anyi yi, wa gna mi ge, “Mila bwi fa gama gyewye! Gaba Yahuda ebye nya, Dawuda Gbegye, nku nasara gyi, woi ku wu ngye wo kun celo wa gu takarda kmi-kmiyi ye ya, wa bma kwo a hatimi tnabaye ya.” 6 Ma shi awye magye, Kugya n gni-agni-gni n a tukwoda shiba cei anyi yi abye, n esu shinkpegye n a nya awye-wyeyi abye, kugya yi n na acigusai kpe n ɓa ɓei wu wo n sadohoi. Wo n na amwai tnaba, n na awyeyi tnaba, n ɓa zhin misali n na Zafun ngun tnabai Shekwoyi anya, n na tnu n cei n sepa dohodohoyi n na anyi.

7 Wa lakala ɓe abye wa gwo takarda kmi-kmiyi n za akun n wo ɓei sase tu n esu-shinkpegye nyi. 8 Shi wo ɓei gwo takarda kmi-kmiyi a tukwoda shiba cei anyi ho, ɓa yazhi n kugya yi abye, zaho-zahoi n ɓa mi n molo yi shi n Zinariya papai n tulare yifi, Shekwoyi aza aduwa. 9 Ɓa kwo anyi woi ge, “ho kuncelo I hala takarda kmi-kmiyi. Ha lo hatimi ya ha gu kwo ya. Gama aɓei la ho zun sha, oho ami n la aza si gaho n na abye vinya, ngye nyaga ntu n Shekwoyi ɓo. 10 Hoi la ɓa yezhi n ebemi, hoi ku ɓa ze a pristi ieyi Shekwoyi anya, ɓa ɓei gyi ebe tu n na anyi tukwo.”

11 Dna n mi ɓewyegye, mawo amalaika n mwa-begye n na wye! Wyeyi dayi n na Tukwodayi, ɓai kwo anyi. 12 “Kugya n na aɓei zunsha. Wo kuncelo wa gwo iko, n kalai, n latuyi, n mwa-mwai n anabarka yi.

13 “Nna vun mawo aza vinya n eshe nanyi yi, n na a zafiyi n ekni mi, n na anuwan yakwoyi ɓai gna, Anabarka, n mwa-mwai, n latu yi, n ikoi, zhin oza nya nu n wo sase tu n esu-shinkpegye nyi, n kugyai nyalonyaloi.” 14 Awye-wyeyi da ɓai ci ge, Amin. A tukwodayi shiba cei anyi ɓai yazhi nwo abye ɓai ga wo mwamwa.